Пытанне: Ці захоўвае дагавор франчайзінгу юрыдычную моц пры змене бакоў у абавязацельстве або пры змене наймення праваўладальніка? Што рабіць пры неабходнасці ўключэння ў прадмет заключанага дагавора франчайзінгу права выкарыстання таварнага знака (знака абслугоўвання) або іншых аб'ектаў інтэлектуальнай уласнасці?

Адказ: Дагавор комплекснай прадпрымальніцкай ліцэнзіі (франчайзінгу) не губляе юрыдычную моц у выпадку пераходу ад праваўладальніка да іншай асобы як аднаго, так і некалькіх выключных правоў на аб'ект інтэлектуальнай уласнасці, які ўваходзіць у ліцэнзійны комплекс (арт. 910-8 Грамадзянскага кодэкса Рэспублікі Беларусь (далей – ГК Рэспублікі Беларусь)). Згода карыстальніка па дагаворы франчайзінгу на такі пераход не патрабуецца, калі іншае не прадугледжана заканадаўствам або дагаворам.

Калі ў працэсе выканання бакамі сваіх абавязкаў па дагаворы комплекснай прадпрымальніцкай ліцэнзіі ў праваўладальніка (камерцыйнай юрыдычнай асобы) змянілася фірменнае найменне, права выкарыстання якога ўключана ў склад ліцэнзійнага комплексу, прадастаўленага па дагаворы франчайзінгу, то дагавор захоўвае сваю юрыдычную моц і працягвае дзейнічаць у дачыненні да новага фірменнага наймення праваўладальніка, за выключэннем выпадкаў, калі карыстальнік запатрабуе скасавання дагавора і пакрыцця страт (арт. 910-9 ГК Рэспублікі Беларусь), паколькі фірменнае найменне цесна звязана з дзелавой рэпутацыяй праваўладальніка і характарызуе брэнд у цэлым.

У выпадку неабходнасці ўключэння ў прадмет заключанага дагавора франчайзінгу права выкарыстання таварнага знака (знака абслугоўвання) або іншых аб'ектаў інтэлектуальнай уласнасці бакі заключаюць дадатковае пагадненне да дагавора, а адпаведныя змяненні падлягаюць рэгістрацыі ў Дзяржаўным рэестры дагавораў комплекснай прадпрымальніцкай ліцэнзіі (франчайзінгу) Рэспублікі Беларусь (падп. 1.2 Пастановы Савета Міністраў Рэспублікі Беларусь ад 21 сакавіка 2009 г. № 346 (у рэд. ад 20 лістапада 2023 г.) «Аб рэгістрацыі ліцэнзійных дагавораў, дагавораў саступкі правоў на аб'екты права прамысловай уласнасці, дагавораў аб залогу маёмасных правоў, якія сведчацца пасведчаннем на таварны знак, знак абслугоўвання, і дагавораў комплекснай прадпрымальніцкай ліцэнзіі (франчайзінгу)»).

05.2026
Падрыхтавала: В. В. Бесарабава, вучоны сакратар НЦІУ