Пытанне: Колькі гадоў пасля смерці замежнага аўтара будзе ахоўвацца выключнае права на яго творы ў Рэспубліцы Беларусь?

Адказ: Выключнае права на твор дзейнічае на працягу жыцця аўтара і сямідзесяці гадоў пасля яго смерці (частка другая п. 4 арт. 994 Грамадзянскага кодэкса Рэспублікі Беларусь).

Пры гэтым згодна з п. 3 арт. 5 Закона Рэспублікі Беларусь ад 17 мая 2011 г. № 262-З «Аб аўтарскім праве і сумежных правах» прадастаўленне на тэрыторыі Рэспублікі Беларусь аховы творам у адпаведнасці з міжнароднымі дагаворамі Рэспублікі Беларусь ажыццяўляецца ў дачыненні да твораў, якія не перайшлі ў грамадскі набытак у краіне паходжання твора з прычыны заканчэння ўстаноўленага ў гэтай краіне тэрміну дзеяння аўтарскага права на гэты твор і не перайшлі ў грамадскі набытак у Рэспубліцы Беларусь з прычыны заканчэння тэрміну дзеяння аўтарскага права на гэты твор.

Такім чынам, калі ў Рэспубліцы Беларусь у адпаведнасці з міжнароднымі дагаворамі ахоўваюцца творы замежных аўтараў, тэрмін такой аховы ў Рэспубліцы Беларусь складзе час жыцця аўтара і 70 гадоў пасля яго смерці (пры ўмове, што ў краіне паходжання твора тэрмін дзеяння аўтарскага права не ўстаноўлены менш названага тэрміну).

У той жа час звяртаем увагу, што ўказаны тэрмін аховы выключнага права дзейнічае з 19 лістапада 2024 г. у дачыненні да твораў, якія не перайшлі на гэтую дату ў грамадскі набытак (паколькі раней у заканадаўстве было ўстаноўлена, што выключнае права на твор дзейнічае на працягу жыцця аўтара і пяцідзесяці гадоў пасля яго смерці, то, калі да 2024 г. прайшло 50 гадоў пасля смерці аўтара, да 70 гадоў ахова яго твораў не прадаўжаецца).

01. 2026
Падрыхтавалі: Т.П. Цэдрык (намеснік начальніка упраўлення аўтарскага і сумежных правоў - начальнік аддзела рэгістрацыі правоў НЦІУ), Д.Х. Градоўкіна (вядучы спецыяліст аддзела рэгістрацыі правоў кіравання аўтарскага і сумежных правоў НЦІУ)