Беларусь у асобах: Рахцеенка Іван Навумавіч
Іван Навумавіч Рахцеенка нарадзіўся 21 верасня 1905 г. у вёсцы Шэкі Дубровенскага раёна Віцебскай вобласці. Скончыў лясны факультэт Беларускай сельскагаспадарчай акадэміі сельскай і лясной гаспадаркі. З 1931 г. працаваў у Беларускім навукова-даследчым інстытуце лясной гаспадаркі на пасадзе старшага навуковага супрацоўніка. Падчас Вялікай Айчыннай вайны працаваў дырэктарам Беларускага філіяла Усесаюзнага навукова-даследчага інстытута лясной гаспадаркі ў Арэнбургскай вобласці. У 1946-1955 гг. – старшы навуковы супрацоўнік Усесаюзнага навукова-даследчага інстытута лясной гаспадаркі ў г. Пушкіне Маскоўскай вобласці. У 1951-1955 гг. – дырэктар Цэнтральнага батанічнага саду Акадэміі навук БССР. У 1957-1979 гг. – загадчык лабараторыі экалогіі раслін Інстытута эксперыментальнай батанікі Акадэміі навук БССР.
І. Рахцеенка – аўтар больш за 200 навуковых прац (у тым ліку 8 манаграфій) у галіне абязлесення, экалогіі каранёвых сістэм драўняных парод, эколага-фізіялагічных і біялагічных асноў узаемадзеяння раслін у супольнасцях. Даследаваў працэсы росту і развіцця каранёвых сістэм драўняных раслін у розных глебава-грунтавых умовах, тэрміны жыццядзейнасці актыўных каранёў, сезонныя цыклы паглынання і вылучэння мінеральных пажыўных элементаў каранямі драўняных раслін і перанос іх ад адной расліны да іншай, узаемаадносіны драўняных парод у лясных насаджэннях рознай тыпалагічнай прыналежнасці.
Вучоным адкрыты новыя палажэнні ў галіне фізіёлага-біяхімічнага ўзаемаўплыву раслін у раслінных супольнасцях. Даследаваў працэсы ўзаемнага ўплыву каранёвых вылучэнняў раслін. Абгрунтаваў прынцыпы сумяшчальнасці відаў раслін у змешаных пасадках, якія больш прадуктыўныя ў параўнанні з чыстымі насаджэннямі. Іванам Рахцеенка распрацаваны прынцыпы падбору біялагічна сумяшчальных відаў з мэтай стварэння высокапрадуктыўных змешаных лясных насаджэнняў.
Па матэрыялах Нацыянальнай бібліятэкі Беларусі
Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).
Фота: НЦІУ
