Беларусь у асобах: Піліпенка Уладзімір Аляксандравіч

18 июля 2025

Цікавае

Уладзімір Аляксандравіч Піліпенка нарадзіўся 18 ліпеня 1949 г. у Мазыры Гомельскай вобласці. Скончыў Беларускі дзяржаўны ўніверсітэт (1971). З 1971 г. – інжынер, начальнік аддзела навукова-даследчага канструктарска-тэхналагічнага ўнітарнага прадпрыемства «Белмікрасістэмы» ААТ «Інтэграл». З 1996 г. – намеснік дырэктара па навуковым развіцці Дзяржаўнага цэнтра «Белмікрааналіз» ААТ «Інтэграл». Прафесар Беларускага дзяржаўнага ўніверсітэта (з 1995 г.).

У. Піліпенка выканаў даследаванні ў галіне кіраванай мадыфікацыі уласцівасцяў паўправаднікоў, тонкіх плёнак металаў і дыэлектрыкаў. Выявіў эфекты, якія прыводзяць да паскарэння працэсаў мадыфікацыі ўласцівасцяў розных матэрыялаў пад уздзеяннем светлавых імпульсаў і прапанаваў механізмы іх узнікнення.

Вучоны распрацаваў метады разліку тэмпературных рэжымаў і вызначыў аптымальныя ўмовы, якія забяспечваюць мінімізацыю такіх высілкаў. Ажыццявіў мадэляванне працэсаў фарміравання розных тонкаплёнкавых сістэм з ужываннем хуткай тэрмічнай апрацоўкі: гэтэрыравання, аплаўлення лёгкаплаўкага шкла, рэкрышталізацыі плёнак алюмінія, дыфузійнага сінтэзу сіліцыдаў розных металаў і інш. Распрацаваў тэхналогію стварэння інтэгральных мікрасхем на базе хуткіх тэрмічных апрацовак.

Прэмія акадэмій Беларусі і Малдовы (2011) за працу «Фазавыя і структурныя мадыфікацыі паверхневых слаёў і плёнак у тэхналогіі паўправадніковых прыбораў і СБІС».

Аўтар больш за 330 навуковых прац, у тым ліку 11 манаграфій, 43 вынаходстваў.

Па матэрыялах Цэнтральнай навуковай бібліятэкі імя Якуба Коласа НАН Беларусі

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).

Фота: НЦІУ