Дзень беларускага кіно

17 декабря 2024

Цікавае

17 снежня ў Беларусі адзначаецца Дзень беларускага кіно. Гэта прафесійнае свята нацыянальных кінематаграфістаў было ўстаноўлена Указам Прэзідэнта Рэспублікі Беларусь у 1994 г.

Гэтая дата невыпадковая: менавіта 17 снежня 1924 г. Савет Народных Камісараў прыняў пастанову аб кінавытворчасці ў БССР, а пры Народным камісарыяце асветы было створана Дзяржаўнае ўпраўленне па справах кінематаграфіі і фатаграфіі, вядомае як «Белдзяржкіно».

З тых часоў беларускае кіно прайшло значны шлях. У 1928 г. была заснавана кінастудыя «Савецкая Беларусь», якая ў 1996 г. атрымала новую назву – «Нацыянальная кінастудыя «Беларусьфільм». Сёння Беларусь ганарыцца мноствам таленавітых рэжысёраў, акцёраў, мастакоў і аператараў, якія ствараюць унікальныя творы кінамастацтва, якія ўзбагачаюць залаты фонд нацыянальнага кіно.

Сярод найбольш вядомых мастацкіх фільмаў беларускага кінематографа розных гадоў: «Лясная быль» Ю. Тарыча, «Чырвонае лісце» У. Корш-Сабліна, «Альпійская балада» Б. Сцяпанава, «Людзі на балоце» У. Турава, «З пекла ў пекла» Д. Астрахана, «Дунечка» А. Яфрэмава, «Брэсцкая крэпасць» А. Котта і інш.

Дзень беларускага кіно – гэта магчымасць адзначыць важнасць аховы інтэлектуальнай уласнасці ў кінаіндустрыі. Ахова аўтарскіх правоў на фільмы, сцэнарыі і іншыя творы мастацтва з'яўляецца адным з ключавых аспектаў развіцця беларускага кіно. Павага да інтэлектуальнай уласнасці дазваляе стваральнікам упэўнена працаваць, ведаючы, што іх творчасць будзе абаронена ад неправамернага выкарыстання.

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).

Фота: НЦІУ