Беларусь у асобах: Вялічка Леанід Сцяпанавіч

8 августа 2025

Цікавае

Леанід Сцяпанавіч Вялічка нарадзіўся 4 жніўня 1925 г. у Старобіне (Салігорскі раён Мінскай вобласці). У 1948 г. скончыў зубатэхнічнае аддзяленне Мінскай зубалячэбнай школы. З 1948 г. працаваў зубным тэхнікам у Старобінскай бальніцы. У 1958 г. скончыў стаматалагічны факультэт Кіеўскага дзяржаўнага медыцынскага інстытута.

Л. Вялічка навучаўся ў мэтавай аспірантуры на кафедры артапедычнай стаматалогіі Маскоўскага медыцынскага стаматалагічнага інстытута. З 1963 г. займаў пасаду асістэнта кафедры стаматалогіі Мінскага дзяржаўнага медыцынскага інстытута. З 1967 па 1993 г. быў загадчыкам кафедры артапедычнай стаматалогіі Мінскага дзяржаўнага медыцынскага інстытута.

Кандыдацкая дысертацыя: «Артадантычнае лячэнне і пратэзаванне пры недаразвіцці верхняй сківіцы ў сфармаваным прыкусе» (1965). Доктарская дысертацыя: «Тэарэтычнае і практычнае абгрунтаванне метадаў артапедычнага лячэння захворванняў парадонту» (1980).

Лаўрэат Дзяржаўнай прэміі БССР (1986) за распрацоўку і стварэнне новых тэхналагічных працэсаў і абсталявання для нанясення тонкаплёнкавых пакрыццяў метадам іонна-прамянёвай апрацоўкі і іх шырокае ўкараненне ў народную гаспадарку.

Пад яго кіраўніцтвам было падрыхтавана 12 кандыдацкіх дысертацый і 2 доктарскіх. За час працы на кафедры апублікавана больш за 180 друкаваных работ.

З’яўляецца аўтарам і сааўтарам манаграфій («Прафілактыка і лячэнне артыкуляцыйнай перагрузкі парадонта», «Комплекснае лячэнне зубачэлюсных анамалій сфармаванага прыкусу»), «Даведніка стаматолага-артапеда» і шэрагу вучэбна-метадычных дапаможнікаў.

Леанідам Вялічка атрымана 10 аўтарскіх пасведчанняў на вынаходніцтвы, 3 патэнта, 5 дыпломаў ВДНГ БССР, 26 пасведчанняў на рацыяналізатарскія прапановы.

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).

Фота: НЦІУ