Выстава РНТБ «Патэнтаванне вынікаў інтэлектуальнай дзейнасці»

У жніўні 2026 г. у чытальнай зале патэнтных дакументаў Рэспубліканскай навукова-тэхнічнай бібліятэкі праходзіць тэматычная выстава «Патэнтаванне вынікаў інтэлектуальнай дзейнасці».

Экспазіцыя прысвечана актуальным публікацыям па пытаннях патэнтавання, выкарыстання і прававой аховы аб'ектаў інтэлектуальнай уласнасці як у Беларусі, так і за мяжой.

На выставе прадстаўлены кнігі і часопісы, зборнікі матэрыялаў канферэнцый, якія адлюстроўваюць практычныя аспекты патэнтнай справы. Асаблівае месца займаюць матэрыялы, якія разглядаюць патэнтаванне як спосаб павышэння канкурэнтаздольнасці беларускіх тавараў, пытанні прававой аховы інфармацыйных тэхналогій, лічбавага графічнага дызайну, спосабаў лячэння і г. д.

Экспазіцыя будзе карысная вынаходнікам, вучоным, прадпрымальнікам, юрыстам, патэнтным павераным, студэнтам і ўсім, хто імкнецца эфектыўна выкарыстоўваць інтэлектуальную ўласнасць як інструмент інавацыйнага развіцця.

Азнаёміцца з выставай можна і ў рэжыме анлайн.

Па матэрыялах РНТБ

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).