Падоўжаны тэрмін дзеяння артыкулаў 1, 3 і 4 Закона Рэспублікі Беларусь ад 3 студзеня 2023 г. № 241-З «Аб абмежаванні выключных правоў на аб'екты інтэлектуальнай уласнасці»

2 снежня 2024 г. Кіраўніком дзяржавы падпісаны Закон Рэспублікі Беларусь «Аб змене Закона Рэспублікі Беларусь «Аб абмежаванні выключных правоў на аб'екты інтэлектуальнай уласнасці» № 42-З (Закон аб змене закона).

Законам аб змене закона прадоўжаны тэрмін дзеяння артыкулаў 1, 3 і 4 Закона Рэспублікі Беларусь ад 3 студзеня 2023 г. № 241-З «Аб абмежаванні выключных правоў на аб'екты інтэлектуальнай уласнасці» (Закон аб абмежаванні правоў) на два гады – да 31 снежня 2026 года ўключна.

Даведка:
Закон аб абмежаванні правоў рэгулюе адносіны, звязаныя з абмежаваннем прыналежных праваўладальнікам выключных правоў на аб'екты інтэлектуальнай уласнасці, а таксама прадугледжвае ўстанаўленне часовай магчымасці выкарыстоўваць аб'екты інтэлектуальнай уласнасці без дазволу іх праваўладальнікаў або арганізацый па калектыўным кіраванні маёмаснымі правамі пры выкананні пэўных умоў.

Акрамя таго, Закон аб змене закона выключае з артыкулаў 3 – 5 Закона аб абмежаванні правоў ацэначныя крытэрыі «крытычны недахоп» і «істотная важнасць для ўнутранага рынку» ў сувязі з аб'ектыўнай немагчымасцю на практыцы ўсталяваць выкананне названых крытэрыяў у дачыненні да канкрэтных тавараў (груп тавараў).

Пры гэтым у Законе аб абмежаванні правоў захоўваецца падыход, у адпаведнасці з якім дапускаецца выкарыстанне аб'ектаў інтэлектуальнай уласнасці, якія змяшчаюцца ў імпартных таварах, без згоды (дазволу) праваўладальнікаў з замежных дзяржаў, у тым ліку якія здзяйсняюць недружалюбныя дзеянні, толькі пры ўмове ўключэння такіх тавараў у адпаведныя пералікі тавараў.

Закон аб змене закона ўступае ў сілу з 1 студзеня 2025 г.

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).