У 2023 г. у краінах ЕАЭС зафіксавана 4667 парушэнняў у сферы інтэлектуальнай уласнасці

9 кастрычніка 2024 г. адбылося пасяджэнне Кансультатыўнага камітэта па інтэлектуальнай уласнасці пры Калегіі Еўразійскай эканамічнай камісіі (ЕЭК). У мерапрыемстве прыняў удзел генеральны дырэктар Нацыянальнага цэнтра інтэлектуальнай уласнасці Уладзімір Рабаволаў.

Паводле інфармацыі дырэктара Дэпартамента развіцця прадпрымальніцкай дзейнасці ЕЭК Ернара Бакенава, у 2023 г. аб'ём выяўленых кантрафактных тавараў у краінах Еўразійскага эканамічнага саюза (ЕАЭС) склаў 5,8 млн адзінак. Лідзіруючыя катэгорыі кантрафактнай прадукцыі ўключаюць вопратку, абутак, аксэсуары, гульні, запчасткі для аўтамабіляў, прадукты харчавання, алкаголь і бытавую тэхніку.

На пасяджэнні быў прадстаўлены шэраг аналітычных дакументаў, уключаючы агляд даных за апошнія пяць гадоў з прапановамі па развіцці сферы інтэлектуальнай уласнасці (ІУ) у рамках ЕАЭС і рэкамендацыямі па ўдасканаленні нарматыўнага прававога рэгулявання ў дзяржавах, а таксама справаздачу аб правапрымяняльнай практыцы ў сферы абароны правоў на аб'екты ІУ у краінах ЕАЭС за 2023 г. Гэтыя матэрыялы будуць апублікаваныя на афіцыйным сайце ЕАЭС.

Акрамя таго, удзельнікі абмеркавалі праект Плана мерапрыемстваў па рэалізацыі Дэкларацыі аб развіцці эканамічных працэсаў да 2030 г., на перыяд да 2045 г. «Еўразійскі эканамічны шлях» у сферы ІУ.

У ходзе пасяджэння разгледжаны практыка прадастаўлення ў краінах ЕАЭС прававой аховы сакрэтам вытворчасці (ноу-хау), асаблівасці рэалізацыі дагавора аб таварных знаках, знаках абслугоўвання і назвах месцаў паходжання тавараў у рамках ЕАЭС.

Таксама ўдзельнікі камітэта абмеркавалі запуск адзінага мытнага рэестра аб'ектаў ІУ, механізмы выпрацоўкі ўзгодненых падыходаў да барацьбы з парушэннямі правоў ІУ ў сетцы Інтэрнэт, стварэнне пошукавага сэрвісу аб'ектаў прамысловай уласнасці, якія ахоўваюцца ў дзяржавах ЕАЭС.

Даведка:
Кансультатыўны камітэт па інтэлектуальнай уласнасці пры Калегіі ЕЭК створаны 25 верасня 2012 г. У яго склад уваходзяць кіраўнікі, намеснікі кіраўнікоў міністэрстваў і ведамстваў і прадстаўнікі бізнес-супольнасці дзяржаў ЕАЭС.

Па матэрыялах ЕЭК

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).