У. Рабаволаў: Актыўнае ўзаемадзеянне з САІУ па-ранейшаму з'яўляецца для Беларусі прыярытэтным напрамкам міжнароднага супрацоўніцтва ў сферы ІУ

12 ліпеня 2024 г. на палях 65-й серыі пасяджэнняў Асамблей дзяржаў – членаў Сусветнай арганізацыі інтэлектуальнай уласнасці (САІУ) у Жэневе (Швейцарыя) адбылася сустрэча генеральнага дырэктара Нацыянальнага цэнтра інтэлектуальнай уласнасці (НЦІУ) Уладзіміра Рабаволава з Генеральным дырэктарам САІУ Дарэнам Тангам.

У ходзе сустрэчы кіраўнік НЦІУ адзначыў, што актыўнае ўзаемадзеянне з САІУ па-ранейшаму з'яўляецца для Беларусі прыярытэтным напрамкам міжнароднага супрацоўніцтва ў сферы інтэлектуальнай уласнасці. Рэспубліка Беларусь імкнецца да фарміравання моцнай і збалансаванай сістэмы інтэлектуальнай уласнасці, якая адпавядае міжнародным стандартам і інтарэсам нацыянальных заяўнікаў.

«Сёння як ніколі важна забяспечыць доступ да інструментаў інтэлектуальнай уласнасці на ўсіх узроўнях. Перакананы, што сумеснымі намаганнямі мы зможам і далей пашыраць магчымасці грамадзян па выкарыстанні ўсіх пераваг як нацыянальнай, так і глабальнай сістэм інтэлектуальнай уласнасці», – падкрэсліў У. Рабаволаў.

Д. Танг высока ацаніў вынікі праведзенай НЦІУ працы, адзначыў высокі ўзровень супрацоўніцтва з САІУ, падтрымаў ініцыятывы і падыходы да развіцця сістэмы інтэлектуальнай уласнасці Беларусі.

Больш навін аб інтэлектуальнай уласнасці – у нашых сацсетках (Facebook, Instagram, Telegram).