На шляху да фіналу конкурсу ў сферы вынаходніцтва «Лепшы патэнт Беларусі»: ТАА «Вытворчае аб'яднанне «Энергакамплект»

Па папярэдніх выніках конкурсу ў сферы вынаходніцтва «Лепшы патэнт Беларусі» вызначаны 15 фіналістаў, адным з якіх стала таварыства з абмежаванай адказнасцю «Вытворчае аб'яднанне «Энергакамплект» – найбуйнейшае прадпрыемства Беларусі па вытворчасці кабельна-правадніковай прадукцыі. Агульная наменклатура выпускаемай прадукцыі складае звыш 100 000 маркапамераў.

На конкурс прадстаўлены распрацаваны Вытворчым аб'яднаннем «Энергакамплект» «Кабель сілавы гнуткі экранаваны», які ахоўваецца патэнтам Рэспублікі Беларусь на карысную мадэль № 11817.

Умовы ажыццяўлення ўсіх падземных працэсаў, звязаных са здабычай і пад'ёмам карысных выкапняў на паверхню, прыраўноўваюцца да экстрэмальных. Пры гэтым шахтныя кабелі з'яўляюцца адзінай магчымасцю падачы электрычнага сілкавання перасовачным машынам і механізмам, якія працуюць пад зямлёй. Кабелі для горных распрацовак з'яўляюцца самымі ўразлівымі звёнамі ў шахтавай сістэме. На іх долю прыпадае 40 % аварый. Таму да шахтавых кабеляў прымяняюцца жорсткія патрабаванні, правільнасць разліку канструктыўных элементаў кабеля і выбар матэрыялаў з'яўляюцца важнай умовай безадмоўнай працы шахтавага кабеля для горных распрацовак.

У параўнанні з замежнымі аналагамі перавага прадстаўленага кабеля заключаецца ў павялічанай яго стойкасці да электрычных і механічных нагрузак. А гэта, у сваю чаргу, павялічвае механічную трываласць кабеля, асабліва пры выгібах, забяспечвае больш высокую надзейнасць пры эксплуатацыі за кошт электраправодных уласцівасцяў. Акрамя таго, забяспечваецца больш высокая трываласць вырабляемага кабеля – парадку 30 % адносна замежных аналагаў. Павелічэнне трываласці дазваляе павялічыць дапушчальную разрыўную нагрузку, паляпшае эксплуатацыйныя характарыстыкі і ў выніку на 15-20 % павышае даўгавечнасць.

Прадстаўлены кабель па патэнце на карысную мадэль Рэспублікі Беларусь № 11817 выкарыстоўваецца для далучэння да крыніц электрычнай энергіі перасовачных машын і механізмаў, якія ўжываюцца пры здабычы карысных выкапняў у падземных выпрацоўках шахт, на адкрытых горных распрацоўках.

Нагадаем, што вызначэнне пераможцы конкурсу і ўзнагароджанне адбудзецца ў рамках IV Міжнароднай навукова-практычнай канферэнцыі «Інтэлектуальная ўласнасць у сучасным свеце: выклікі часу і перспектывы развіцця», якая пройдзе 22-23 кастрычніка 2024 г.

Жадаем поспеху фіналісту конкурсу «Лепшы патэнт Беларусі»!

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).