Лічбавая трансфармацыя інфраструктуры сферы ІУ: інструменты павышэння якасці паслуг патэнтнага ведамства Рэспублікі Беларусь

5 декабря 2024

Падзеі

5-6 снежня 2024 г. у Астане праходзіць XII Міжнародны форум «Антыкантрафакт-2024», прысвечаны пытанням процідзеяння незаконнаму абароту прамысловай прадукцыі, у тым ліку абароны правоў у сферы інтэлектуальнай уласнасці.

Ад Нацыянальнага цэнтра інтэлектуальнай уласнасці (НЦІУ) у мерапрыемстве з дакладам у рэжыме анлайн выступіла Марыя Шматава – начальнік аддзела права прамысловай уласнасці і дагавораў упраўлення прававога і кадравага забеспячэння.

У сваім выступе М. Шматава разгледзела шэраг ключавых ініцыятыў па цыфравізацыі паслуг патэнтнага ведамства, уключаючы ўкараненне Інтэрнэт-партала для электроннай падачы заявак на аб'екты прамысловай уласнасці, які быў запушчаны 1 кастрычніка 2022 г. Дзякуючы гэтаму інструменту заяўнікі могуць выдалена ўзаемадзейнічаць з патэнтным органам, што істотна спрашчае працэс падачы заявак: «Мы імкнемся мінімізаваць выдаткі і намаганні заяўнікаў пры атрыманні паслуг. У 2023 г. працэнт электронных заявак для таварных знакаў дасягнуў 50,8 %», – падкрэсліла начальнік аддзела права прамысловай уласнасці і дагавораў упраўлення прававога і кадравага забеспячэння.

НЦІУ працягвае ўдасканальваць і саму падачу заявак. З 1 студзеня 2024 г. заяўнікі могуць падаць у якасці дадатковых матэрыялаў да заявак на выдачу патэнтаў Рэспублікі Беларусь на вынаходства, карысную мадэль або прамысловы ўзор графічныя матэрыялы або выявы ў фармаце 3D-мадэлі.

Даклад таксама закрануў паляпшэнні ў прадстаўленні патэнтнай інфармацыі: у бягучым годзе НЦІУ ажыццявіў пераход да бесперапыннага апублікавання ўсіх афіцыйных бюлетэняў, што забяспечвае аператыўны доступ да актуальнай інфармацыі.

Акрамя таго, прадугледжаны далейшыя крокі па цыфравізацыі адміністрацыйных працэдур (АП): з 47 працэдур, якія падлягаюць пераводу ў электронную форму, у 2024 г. пераведзены 34 і даступныя на Адзіным партале электронных паслуг (АКПЭП) і праз мабільны дадатак «Е-паслуга».

«Усе патэнтна-інфармацыйныя паслугі і паслугі па дэпаніраванню аб'ектаў аўтарскага права і сумежных правоў даступныя ў выдаленым фармаце. Дастаткова мець электронную пошту і любое банкаўскае прыкладанне для аплаты праз сістэму адзінай разліковай і інфармацыйнай прасторы (АРІП)», – дадала М. Шматава.

Спікер таксама пазначыла планы па далейшай лічбавай трансфармацыі патэнтнага ведамства Беларусі ў 2025 г., якія сканцэнтраваны на цыфравізацыі сферы калектыўнага кіравання правамі: «Мы маем намер стварыць платформу асабістых кабінетаў для аўтараў і карыстальнікаў, што спросціць узаемадзеянне і дазволіць кіраваць правамі і ўзнагароджаннямі ў электроннай форме».

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).