Прадстаўнікі НЦІУ аддалі даніну памяці воінам-вызваліцелям напярэдадні Дня Незалежнасці

2 июля 2024

Падзеі

2 ліпеня 2024 г. напярэдадні Дня Незалежнасці кіраўніцтва Нацыянальнага цэнтра інтэлектуальнай уласнасці, актыў першаснай прафсаюзнай арганізацыі і прадстаўнікі Савета маладых вучоных ведамства ўсклалі кветкі да помніка воінам-вызваліцелям (Танк Т-34) побач з Цэнтральным Домам афіцэраў.

Баявую машыну ўсталявалі яшчэ ў 1952 г. Першапачаткова помнік быў прысвечаны ўсім танкістам, якія ўдзельнічалі ў вайне. Пліта была ўпрыгожана словамі «На палях бітваў савецкія танкісты паказалі бяспрыкладную мужнасць і з гонарам выканалі свой абавязак перад Радзімай. І. B. Сталін». У 1970 г. помнік адрэстаўравалі, танку быў прысвоены бартавы нумар Л-145. А на пастаменце з'явіўся новы надпіс аб воінах 4-й танкавай брыгады, якія 3 ліпеня 1944 г. першымі ўвайшлі ў Мінск.

Бой на вуліцах сталіцы добра вядомы. Тры танкі Т-34 па Маскоўскай шашы (пр-т Незалежнасці) у раёне абсерваторыі прарваліся ў горад. Іх сустрэла нямецкая артылерыя. Галаўны танк падбілі – члены экіпажа атрымалі раненні, камандзіру машыны гвардыі капітану Паўлу Кароўнікаву адарвала нагу. Танк малодшага лейтэнанта Дзмітрыя Фролікава, які ішоў следам, раздушыў замаскіраваную батарэю і, не зніжаючы хуткасці, працягнуў рух наперад. Трапнымі стрэламі былі знішчаны самаходная прылада «Фердынанд» і супрацьтанкавая гармата. Шлях у сталіцу быў адкрыты, і неўзабаве ў эфіры прагучалі словы: «Я Фролікаў. Знаходжуся ў Мінску».

Услед за танкамі ў Мінск увайшлі пяхотныя часці 31-й арміі. Яе байцы ўзнялі чырвоныя сцягі на дах Дома ўрада, Дома Чырвонай Арміі і іншых будынкаў, адбітых у ворага.

Д. Фролікаў загінуў ва Усходняй Прусіі 2 лютага 1945 г., а 24 сакавіка за ўзорнае выкананне заданняў камандавання ў баях з нямецка-фашысцкімі захопнікамі і праяўленыя пры гэтым мужнасць і гераізм яму пасмяротна прысвоілі званне Героя Савецкага Саюза.

Па матэрыялах Агенцтва «Минск-Новости»

Больш навін – у нашых сацсетках (Facebook, Instagram, Telegram).